Leef Vastelaovendsvrun vaan Mestreech en umstreke,
De SMV is – zjus wie eder jaor – enthousias begós um ’t volk te invitere um weer e passend Vastelaovendleed te componere. Mer leefs 18 leedsjes zien ingesjik door de versjèllende componiste, sjrijvers en zengers.
V’r zien gruuts tot oondaanks de oonzeker tije gebleke is tot ’t Vastelaovendsgeveul us in ’t blood zit en krup boe ’t neet goon kint. Wie eder jaor is ’n selectie gemaak boebij 7 kandidaote in de finaal-runde koume.
V’r loerde denao oet um dees 7 leedsjes te kinne prizzentere aon ’t volk vaan Mestreech op ‘ne sjieken aovend vaan spanning, samezien en plezeer.
Spieteggenóg make de – door de regering aongekondegde – maotregele um corona te beteugele ’t oonmeugelek um same te koume in groeter groepe in ’n ruimte.
Zoe heet de SMV ouch getwiefeld of v’r de verkezing mesjiens neet gans mooste aofgelaste. ’t Werk vaan alle deilnummers zouw daan veur niks zien gewees. ei Dink is zeker: Ederein zal ziech dizze bezunderen tied op zien eige meneer rappelere!
V’r zien tot de conclusie gekoume tot ’t leedsje ouch hoop, vräög en truus kin geve in dees tije. De traditie tot eder jaor zien eige Vastelaovendsleed verdeent, wèlle v’r neet verlore laote goon.
Daorum höbbe v’r e format gevoonde wat rech deit aon de corona veilegheidsmaotregele en toch door ederein gevolg kin weure.
De SMV heet de han inein geslage mèt RTV-Mestreech um ederein te laote genete vaan de verkezing vaan ’t Vastelaovendsleed vaan 2021. TV-Mestreech sjik ’t oet en verzörg zoe ‘ne leuken aovend boebij de 7 leedsjes mèt ‘ne clip geprizzenteerd weure.
Zaoterdag 2 jannewarie 2021 vaanaof 19.00 oor zalle alle leedsjes te bekieke zien op TV-Mestreech.
Op deen aovend en de ganse week denao kint ederein zien/häör stum oetbringe via SMS, geer kint mèr eine kier eur stum oetbringe en de kostte zien € 1,10 per sms. De lijn slut op 8 jannewarie um 23.59 oor.
Ouch de vakjury zal vaanoet de eige hoeskamer stumme op ’t veur hun geveul bèste leedsje. Hun stum telt veur 40% mèt. Die vaan ’t Vollek vaan Mestreech veur 60%.
Op Zaoterdag 9 jannewarie make v’r daan de winner bekind in ’n leuke oetzending op TV Mestreech en wete v’r welk leed in ’t bezunder jaor 2021 us truus, löstegheid, blijheid en hoop es ‘tune’ vaan Vastelaovend brink.
Veer es SMV zien blij en gruuts tot v’r toch veur e leechpuntsje wete te zörge in dees somber tije. V’r loere denao oet en zègke: “Haw Pin!”
De zeve finaliste zien:
Veer mage neet …
SMS naor 4411 MVK 1
Gezoonge door: Duo X-Elle
Tekst : Noël Fabry / muziek : Raymond De Pauw
Sjevraoje
SMS naor 4411 MVK 2
Gezoonge door: Gino Fey en Marcel van Golde
Tekst : Patrick Keerssemeeckers / Muziek : Nico Heutz
Us Mestreechs
SMS naor 4411 MVK 3
Gezoonge door; Frans Theunisz en de köp
Tekst : Erwin Lennarts / muziek : Patrick Ummels
Haw pin (zoe lang ’t kin)
SMS naor 4411 MVK 4
Gezoonge door: Aajd- Zèlver
Tekst : Egidius Cratsborn (i.s.m. Lars Franzen) / Muziek : Egidius Cratsborn
't Vastelaovendsvirus
SMS naor 4411 MVK 5
Gezoonge door: 'T Vollek vaan Mestreech
Tekst : Noël Fabry / Muziek : Raymond De Pauw
Wat e gelök
SMS naor 4411 MVK 6
Gezoonge door: Comsi Comsa
Tekst : Patrick Jaspers / Muziek : Bart Storcken
Sjuif
SMS naor 4411 MVK 7
Gezoonge door: Roger Borgman
Tekst : Thei Dols / Muziek : Hans Emmen
