Nao 'n jaor zoonder neumensweerdege carnavalsactiviteite hadde veer de stèlle hoop tot veer in 2022 wel weer aon de geng kóste goon en dao hadde veer alles veur geregeld en klaor veur stoon. Nao de peersconferentie vaan aofgeloupe vriedeg 14 jannewarie, en de noe geldende corona maotregele heet ’t bestuur jaomer genóg ’t besluut mote neume tot veer geine Prins kinne oetrope op zoondag 30 jannewarie en tot veer ‘ne Prins gein wierdeg sezoen kinne beeje. ’t Zal dus helaas veur ’t twiede jaor achterein zien, zoonder Prins.
Weijer zalle veer alle geplande activiteite oetstèlle of verplaotse nao ’n aander momint in ’t sezoen of mesjiens zelfs later in ’t jaor.
Op dit momint zien veer us aon ’t bedinke wat, en veural wienie, veer dinger wél kinne organisere.
Meh vaan ein dink kint geer vaan us op aon… Veer zalle us zier zeker in de vastelaovendstied in us wieke Lummel en Nazareth laote zien en hure. Zjus wie eder jaor zalle veer de sjaritiet hoeg in us veendel mèt us mèt drage.
Veer goon uuch zoe good es meugelek op de huugte hawwe. Dat doen veer op us websaajt, Facebook en Instagram.
Um toch 'n bitteke sfeer in de straote en de wieke te bringe wèlle veer uuch vraoge um de carnavalsvlag oet te haange vaanaof zoondag 30 jannewarie tot Asselegoonsdag. En um eur roete, etalaasj, eure hoof en eur straote te versere. Zoe drage veer same de carnavalssfeer oet.
Veer hope tot geer mèt zalt doen en veer de wieke Lummel & Nazareth en hopelek gans Mestreech, roed, geel en greun zalle laote kleure.
Alvas bedaank
CV de Braniemeekers
