Ouch dit jaor môste veer op zeuk naor ‘ne kandidaot dee in aonmérking zow koume veur de hoegste óndersjeijing. En wie dat daan zoe geit weurt ‘r un beijeinkoms gehawwe boe in dat besprooke weurt. De kemmissie bestoond oet de winnares vaan veurig jaor, mevrouw Elly Oudmans, aaijd Prins Marcel d’n ierste en nog twie aander Braniemeekers.

Veer zien begôs mét ut opsjrieve vaan naome vaan luij die us te binne sjoote, die gét veur de gemeinsjap Lummel of Nazareth beteikend höbbe of nog beteikene. D’r woorte hiel gét naome genump, mér d’r staok eine mét kop en sjouwers bovenoet. V’r waore daan ouch hiel gaw en einsgezind d’roet. Dit is de persoen boevaan veer voonte tot heer de hoegste óndersjeijing al väöl ieder verdeent had. En wee is dee persoen daan, zeen iech uuch dinke. Normaal gesprooke bouw ste zoen verhaol un bitsje op. Méh mét dizze maan is dat beslis neet meugelik. Heer woent in Lummel en heer heet ‘ne bezuunder groete palmares, boe ste uuch tege zègks. Es iech uuch gaon vertelle wat heer allemaol gedoon heet, wét eederein euver wee tot ’t geit. Al in 1959 begôs zien impozante carriêre es vereinigingsmaan.

Es koejong gaof heer ziech op es lid vaan de drumbend vaan famfaar Zjuliana. Umtot heer besjikde euver bezuunder talente, woord heer in de weije vaan Heugem klaorgestoomp um, zoe wie later bliek, ein vaan de mies succesvolle tamboermaitres van Mestreech te weure. In 1962 al leep heer veur d’n ierste kier veurop in de cortége vaan Mestreech. In 1971 waor heer d’n ierste gediplomeerde instruktäör vaan Mestreech. Mét de drumbend ging ’t cresjiendo en d’r woorte euveral de hoegste preize weggehaold. De drumbend waor de ierste in Mestreech die de superijeur aofdeiling behaolde. Oet de mie es 40 óndersjeijinge die heer in de loup d’r jaore gekrege heet is de keuningklikke óndersjeijing die boe heer ut mies gruuts op is. In 1963 trooij heer tow tot ut bestuur. 25 jaor laank heel heer ziech bezig es veurzitter vaan ’t feescommité die hiel väöl fieste georganizeerd höbbe. Zjubileijfieste, serenades bringe, mini-preuvenemint. V’r kinne ut neet zoe gek bedinke of heer heet ut gedoon. Ut hoegtepunt heet heer zèlf altied gezag waor ’t foetbaltoernooij vaan de hier Melchior in de Geusselt. Óndaanks tot ut aontal leije de lèste jaore flink aon ut trök loupe is weit heer toch eeders kier opbenuits de motivaasie te vinde die nuudig is um door te goon.

Ouch mét de vastelaovend is heer zier begaange en zeker geine oonbekinde. De Kaanjeleers höbbe un spesjaol pläötske in zien hart. Sinds 1959 is heer dao al beij en es prizzedent is heer nog altied eine vaan de kaartrèkkers vaan die sjoen vastelaovendsvereiniging die de vastelaovend in Lummel en Nazareth un wèrm hart tow dreug. Geer snap netuurlik wel tot iech heij nog wel e tiedsje mét zow kinne doorgoon mét vertelle euver dizze maan, méh ut is oonmeugelik um alles op te numme wat heer allemaol gedoon heet. Veer vinde tot ‘ne maan dee in 2011 al 52 jaor lid is vaan Famfaar Zjuliana, al 49 jaor tamboermaitre is, al 48 jaor bestuurslid en al 42 jaor instruktäör ut vaan ganse harte verdeend um de hoegste óndersjeijing 2011 in oontvangs te maage neume. Maage veer Pie Feijt vaan harte oetnudige heij nao bove te koume um ziene pries op te hoole.