Aofgeloupe zaoterdag, 6 fibberwarie, zien veer same mèt de keender vaan de jäögraod en de tienergrôp veur de twiede week, weijer gegaange mèt eus sjariteitsbezeukskes.
Obbenuits höbbe veer de lui bezeuk die ziech inzètte veur eus vereineging, luikes die kraank zien of gewoen get aondach verdene in deze oonröstege tied. Gewoen eve vertèlle tot veer ze daankbaar zien, aon de luikes deenke en tot zie Pin mote Hawwe. D’r is leech aon ’t ind vaan d’n tunnel, meh ’t geit wel nog effekes dore. Mèt ’n klein kedoke en get vreunteleke wäördsjes wèlle veer ze 'n hertsje oonder de reem steke. De koumende daog tot aon de vastelaovend goon veer gewoen weijer d'r mèt.
HAW PIN #veerzienvastelaovend
Beloert uuch de foto's op de volgende pagina:
Neve de Sjariteitsbezeukskes en de actie veur de lui die ziech in de zörg veur eus allemaol oet de naod wèrke, höbbe veer ouch get lui bedaank en oondersjeije mèt eus Haw Pin medaalje. Helaas mage veer ze dit jaor neet opspange, meh ze weurt op ’n sjoen meneer oetgereik.
Veer höbbe väöl leuke reacties gehad wie veer de medaalje geprizzenteerd höbbe op Facebook. D’r waore hiel get lui die de medaalje gere wouwe höbbe en dao groof geld veur gebooje höbbe. Helaas veur die lui, höbbe veer beslote tot de medaalje neet te kriege en al zeker neet te koup is. Veer hawwe vas aon eus aw traditie, die zeet:
“ ’n medaalje kinste neet vraoge of koupe, ’n medaalje móste verdeene”
Vaanoet die gedachte höbbe veer get lui goon bezeuke um ze te verrasse en veural te bedaanke veur wat zie veur eus vereineging of veur de vastelaovend in z’n algemein beteikene. Tot aon de vastelaovend zalle veer nog de nudege lui opzeuke en bedaanke!
Hij oonder ’n paar foto’s vaan lui boe veer zien langs gewees en die zelf dee foto op Facebook gezat höbbe.
#veerzienvastelaovend
Beloert uuch de foto's op de volgende pagina:
Op verzeuk vaan ’n aontal lui höbbe veer nui club vlagge bestèld. Es geer interesse höb, daan kint geer die ouch bij us bestèlle. Ze zien in versjèllende maote en prijze te kriege:
70 x 100 cm à € 18,50 per stök
100 x 150 cm à € 29,50 per stök
Aander aofmetinge zien meugelek meh die moote veer bestèlle.
Bestèlle kin op info@braniemeekers.nl #veerzienvastelaovend
't Mestreechs Vastelaovendspakket is oetverkoch!
De 1.111 besjikbare pakkètte zien allemaol verkoch.
Geweldeg, meh wat nog sjieker is … is to veer daankzij de gooje verkoup en mèt mètwèrking vaan 't Elisabeth Strouven Fonds, leefs 222 pakkètte kinne donere aon Quiet Community Maastricht (www.quiet.nl). Hiel väöl daank veur al eur bestèllinge via CV de Braniemeekers of alle aander SMV vereineginge en de Keemeleers in Mestreech.
Veer goon deveur zörge tot dien pakkèt op zaoterdag 13 fibberwarie bij diech thoes weurt bezörg.
#veerzienvastelaovend #plezeerensjariteit
Aofgeloupe zoondag, 31 jannewarie, höbbe veer zoeväöl meugelek lui oet eus wieke Lummel & Nazareth die in de zörg wèrke goon bedaanke veur hunne inzat.
Vaanaof 6 oor in de vreuge mörge zien veer pósters goon plakke um ederein te bedaanke. Ouch de lui boe vaan veer neet weite tot zie in de zörg wèrke, wèlle veer zègke:
"DIECH BIS 'NNE TOPPER!!"
Bestuur CV de Kakpepers en CV de Braniemeekers #veerzienvastelaovend