De hoegste ondersjeijing 2008 "Frans Ritz"

Veer goon trök nao ’t jaor 1974 wie gans Mestreech met de Vastelaovend zóng: zie deit in boter, mèllik, kies en veerse eiër rommedoekes en zoe mie. Zie het Maria Petronella en zoe weiër méh veur miech blijf ’t Merie ….  Dit leedsje zóng ouch deginnige wat dit jaor de ier heet um de hoegste óndersjeijing te mage kriege. Of heer mèt d’n inhaajd get gedoon heet laote veer nog effekes in ’t midde.

In ‘t leve vaan d’n oontvenger vaan dit jaor zien hiel get memorabele dinger gebäörd in de jaore dat heer in Lummel mèt geit. Zoe vierde heer dat jaor, iech mein in 1974 ziene primeur bijj ’n club vaan vrun die soms ouch nog get te vreigele höbbe méh daoneve ’n sjoen stok invölle vaan dee oonvervalste Mestreechter Vastelaovend. Nao ’n aontal jaore heel heer ’t veur gezeen en gong ziech met aander dinger bezig hawwe. Heet heer die dinger good gedoon ? Jao iech geluif ’t wel gezeen de dinger die veer gehuurd höbbe zoe links en rechts. In, iech verraoij ’t jaor neet kaom heer trök op ziene stek en góng heer zwajeus met de skepter in zien hand de Vastelaovend vierders vaan Lummel en Nazareth veur. Dat die dat geweite höbbe sprek veur ziech want ’t waor d’n opgaangk nao ’n oonvergetelik jaor vaan die vastelaovensvereiniging die bij häöm noets veur niks aonklop. Kloppe aandere daan veur niks bijj häöm aon ? Nei veur bekans ederein steit heer klaor is ’t euverdaag of ’s aovens bekans niemes liet heer stoon of steit bijj häöm veur ’n geslote deur. Es heer kin hellepe deit heer dat vaanoet zien hart. Neet allein in d’n tied vaan de Vastelaovend zuut me häöm renne en vlege ouch door ’t jaor is heer roond ’t voetbalveld te vinde. Is ’t neet veur de jäög daan is ’t veur de sjoen meidskes die ouch ‘ne bal wèlle trappe. En es d’r daan ‘ns niks te voetballe is daan verblijjd heer ze met get aanders. Daan kin ’t wel ‘ns gebäöre dat me häöm verget meh dat deit häöm niks op zien eigense meneer kump heer trök. Is ’t enen echte Mestreechteneer ? Iech kin volmondig jao zègke. Boemèt ? Heer is zelden of noets op tied en de opmerking ’n Mestreechs keteerke pas bijj häöm. Wat weite veer nog mieër vaan häöm wat geer moot weite. Vergaderingen gief heer kleur door eders kier obbenuijts trök te koume op dinger die al hiel laank en breid zien oetgelach en beslote. Daan kump heer met de veur häöm bekinde opmerking: Es veer dat noe zoe of zoe doen is dat toch neet beter, met aander wäörd heer gief kleur aon ’n vergadering. Al is neet edere kretser gesjarmeerd de vaan meh dee dink laot ‘m mer ’t is noe einmaol zoe.

Wat heer neet deit binne ’n vereiniging is eigelik neet zoe hiel väöl. Vaan habsjaar tot trosjer vaan maan met leuke ideekes die miestal lang blieve haange tot invalle die daan door sommige luijj snel gerealiseerd mote weure. Klop bijj häöm aon en ’n idee is gebore. Heer zuut metein welke kant me op wel. Wat de jäög aon geit heet heer ouch ’n groet hart. Want wat zou die jäög zien zoonder häöm. Daankzijj häöm viere die noe ouch al hiel get jaore Vastelaovend in Lummel met alles d’r op en d’r aon.  Iech begôs mien sermoen mèt dat Vastelaovens leedsje noe veer zoe bitteke aon ’t ind zien wel iech hijj op trök kómme. In dit geval kinne veer spreke vaan heer deit in boter, kies eier en nog hiel get mieër meh eerdappele en greunte is zien gruutste trots. Vreuger langs de deur en noe al hiel get jaore met e teske koffie klassjenere en fielezofere met zien klensjes groet en klein meh veural luustere en bedinke vaan eders kier get nuijts um aon dee sjoene weeg te blieve tummere vaan zien Lummel.

Noe geer allemaol in de gate höb wee dit jaor de ier heet um de hoegste oondersjeijing  te mage oontvaange kin iech uuch verklappe dat heer ouch nog get heet met paoseiër en leeg flesse, gere lekker hepkes ét met e lekker gleeske beer of e wijnsje met es sajs ’n aordig stökske meziek en op zienen tied ’n denske met ein vaan die sjoen bluimkes boe Lummel riek aon is al, is ’t mér door of daanzijj de greunte en wat al neet mieër wat heer de luijj verkuip.
De kemissie die ziech bezig hèlt met die sjoen tradisie vaan get appaarts veur ‘ne apaarte mins heet daan ouch beslote in ’t jaor 2000 + 11 - 3 FRANS RITZ veur te drage en op te numme in dees bezunder oondersjeijing.